Miðlæg staðsetning tryggir gott aðgengi að helstu umferðaræðum sem sparar tíma. Þannig er örstutt í helstu stofnbrautir eins og Sæbraut, Kringlumýrarbraut og Miklubraut.
Á Heklureitnum er staðsett ein af heitavatnsborholum Reykjavíkurborgar. Í tengslum við hana var ákveðið að setja upp listaverk á reitnum þar sem undirgöng allra húsanna væri vettvangur. Þórdís Erla Zoëga myndlistarkona var valin til verksins og er hún ekki ókunnug því að vinna verk sín nærri hitaveitum. Hún á þegar listaverk sem prýðir borholu á Seltjarnarnesi og á næstunni mun hún einnig vinna verk fyrir hitaveituna í Helsinki.
Hér til hliðar er skemmtilegt viðtal við Þórdísi þar sem hún segir frá tilurð verksins sem hún kallar Flæði og hvernig hún fléttar skemmtilega gömlum dagmálum kallaðar eyktir inn í verkin í göngunum.
Stutt frá Heklureit er eitt vinsælasta útivistarsvæði Reykvíkinga, Laugardalurinn enda skjólsæll með vel skipulagða göngu- og hjólastíga. Þar er að finna helstu íþróttamannvirki borgarinnar eins og Laugardalshöllina, Laugardalsvöllinn, Laugardalslaugina og Skautahöll Reykjavíkur. Í hjarta dalsins er svo Grasagarður Reykjavíkur og Fjölskyldu- og Húsdýragarðurinn og getur öll fjölskyldan fundið þar afdrep og afþreyingu við hæfi.
Einn vinsælasti ferðamannastaður borgarinnar er án efa Sólfarið, sem er glæsilegt listaverk eftir Jón Gunnar Árnason. Aðal menningarhús Reykvíkinga stendur síðan álengdar, Harpan með sínum sérstöku gluggum og sjarmerandi staðsetningu við smábátahöfnina.
Aðal umferðaræð Reykjavíkur er Sæbrautin en við hlið hennar sjávarmegin eru vinsælir hjóla- og göngustígar. Það má sjá fólk á ferðinni á öllum tímum sólarhringsins gangandi, skokkandi og hjólandi.
